الحق في النفاذ إلى المعلومة

 

الحق في النفاذ إلى المعلومة كلمة ولاّت تتعاود برشة و نسمعو بيه برشة اما فعليا أغلبية الناس مايعرفوش شنوا الحق هذا؟الحق هذا هو حق دستوري مكرّس بالفصل 32 من دستور 2014 و نلقاوه زادا في برشة مواثيق دولية كيما الإعلان العالمي لحقوق الإنسان ولا العهد الدولي الخاص بالحقوق المدنية و السياسية
موش هذا اكهو
في تونس عنا قانون كامل ينظم الحق هذايا هو قانون عدد 22 لسنة 2016 المتعلق بالنفاذ إلى المعلومة

ببساطة اش نقصدو بالحق في النفاذ إلى المعلومة؟

الحق هذا يضمنلك تتحصل على اي معلومة مدونة من عند هيكل عمومي ولا إدارة مهما كان تاريخها ولا شكلها
بتعبير أبسط تنجم تطلب مثلا انك تتطلع على ميزانية بلديتك ولا الفلوس اللي تصرفت على الكباس اللي مقابل دارك ولا حتى تتطلب انك تتحصل على الشروط اللي تعتمدها بلديتك بش تعطي رخص بناء

علاش الحق في النفاذ إلى المعلومة مهم؟

خاطرو حق ضروري و يعتبر من أبجديات الديمقراطية التشاركية
حق يخليك تحمي حقوقك من الانتهاكات
تساهم بش تحمي بلادك من الفساد و خاصة سوء التصرف في المال العام
و خاطرو زادا يخليك تتخذ قرارات بناء على معطيات صحيحة

كيفاش نمارس حقي في النفاذ إلى المعلومة؟

اذا نحب نتحصل على معلومة ف لازمني نتقدم بمطلب للهيكل المعني يتسمى مطلب النفاذ إلى المعلومة بأكثر من طريقة بالبريد بالفاكس ولا حتى بطريقة مباشرة
مطلب انصص فيه اسمي و لقبي و عنواني و الطريقة اللي نحب نتحصل بيها على المعلومة إلكترونيا حضوريا ولا ورقيا

قداش يتكلفلك مطلب النفاذ إلى المعلومة ؟

مبدئيا حقك في النفاذ إلى المعلومة تمارسو بصفة مجانية
الا اذا كانت المعلومة اللي بش تتحصل عليها يقتضي توفيرها شوية مصاريف وقتها استثنائيا تكون مطالب بش تدفع المصاريف هذي

بعد قداش يجاوبوك على المطلب ؟

مبدئيا يجاوبوك بعد 20 يوم
لكن استثنائيا و حسب المعلومة و الحالة تنجم تتقلص مدة العشرين يوم ولا تتمد
و اي تغيير يطرأ على مدة ال20 يوم الإدارة مطالبة انها تبلغك بيه
تنجم يتتقلص اجل ال 20 يوم ل48 ساعة إذا كانت المعلومة تنجم تأثر على حياة الشخص ولا على حريتو
ونجمو زادا نختصرو الاجال لعشرة ايام اذا طلبت تتطلع على المعلومة على عين المكان
تتمدد مدة ال 20 يوم اذا طلبت انك تتطلع على أكثر من معلومة عند نفس الهيكل

ينجم يرفض الهيكل مطلب النفاذ إلى المعلومة؟

ايه نعم ينجم يترفض مطلبك من قبل الهيكل اللي توجهتلو اما بطريقة ضمنية وقت تمر الاجيال و مايجاوبكش
ولا بطريقة كتابية ووقتها يكون الرفض هذا معلل

شنوة تعمل بش تطعن في قرار الرفض؟

ساهل برشة وقتها تتوجه لهيئة النفاذ إلى المعلومة في غضون 20 يوم و يكون الطعن عن طريق عريضة تسجل فيها هويتك عنوانك نسخة من مطلب النفاذ إلى المعلومة و نسخة من قرار الرفض و تقدمها للهيئة بصفة مباشرة بالفاكس بالبريد و لا بالبريد الاكتروني
القرار النهائي للهيئة يكون قابل للاستئناف سواء من طرفك انت ولا من طرف الهيكل قدام المحكمة الإدارية في غضون 30 يوم

 

 تابعونا على صفحة الفايسبوك أو على هذا الموقع من أجل مزيد الأخبار